عطاء اللہ تارڑ کا پی ٹی آئی پر تنقید، وزیراعظم کی اقوام متحدہ میں تقریر کو فلسطینی نمائندوں کی جانب سے بھرپور پذیرائی ملی، پاکستان امریکا اور ایران کے درمیان ثالثی کا کردار ادا کر رہا ہے، وزیر اطلاعات
اسلام آباد: وفاقی وزیر اطلاعات و نشریات عطاء اللہ تارڑ اور وزیراعظم کے کوآرڈینیٹر برائے خیبرپختونخوا اختیار ولی نے نیوز کانفرنس کرتے ہوئے کہا ہے کہ وزیراعظم شہباز شریف نے اقوام متحدہ کی جنرل اسمبلی میں پوری امت مسلمہ کا مقدمہ واشگاف الفاظ میں لڑا، ان کی تقریر کو دنیا بھر میں سراہا گیا جبکہ فلسطینی نمائندوں نے بھی وزیراعظم کی تقریر کو بھرپور داد دی۔
عطاء اللہ تارڑ نے کہا کہ فلسطینی عوام کے لیے پاکستان کے جذبات محض بیانات تک محدود نہیں بلکہ عملی اقدامات بھی سب کے سامنے ہیں۔ فلسطینیوں کے لیے امدادی سامان بھجوایا گیا جبکہ وزیراعظم نے فلسطینی طلبہ کی میڈیکل تعلیم کے لیے بھی کردار ادا کیا اور فلسطینی طلبہ پاکستان میں تعلیم حاصل کر رہے ہیں۔
انہوں نے کہا کہ وزیراعظم نے فلسطین کا مقدمہ مؤثر انداز میں پیش کیا اور اسرائیل کی مذمت کی۔ وزیراعظم نے واضح کیا کہ پاکستان کشمیریوں کی حمایت جاری رکھے گا اور ان کے حق خودارادیت کے لیے اپنی آواز بلند کرتا رہے گا۔
وزیر اطلاعات کا کہنا تھا کہ فیلڈ مارشل سید عاصم منیر کی دلیرانہ قیادت میں بھارت کو منہ توڑ جواب دیا گیا۔ امریکی صدر نے بھی وزیراعظم کی تقریر کا کلپ سوشل میڈیا پر شیئر کیا۔ انہوں نے کہا کہ دنیا دیکھ رہی ہے کہ پاکستان امریکا اور ایران کے درمیان ثالثی کا کردار ادا کر رہا ہے، جلد تیل کی قیمتیں نیچے آئیں گی اور عالمی معیشتیں ترقی کریں گی۔
27 ستمبر کا مارچ اور خیبرپختونخوا کی سیاست
عطاء اللہ تارڑ نے پاکستان تحریک انصاف کے 27 ستمبر کے مارچ پر تنقید کرتے ہوئے کہا کہ مارچ کی تاریخ خود پی ٹی آئی نے دی تھی لیکن اس کی کوئی تیاری نہیں کی گئی۔ ان کے بقول پی ٹی آئی اس وقت اپنی کمزور ترین سیاسی پوزیشن پر ہے۔
انہوں نے الزام عائد کیا کہ پی ٹی آئی کا دہشت گردوں کے ساتھ گٹھ جوڑ ہے اور وہ دہشت گردوں کی مذمت کرنے سے بھی گریزاں ہے۔ وزیر اطلاعات نے کہا کہ پولیس اور سکیورٹی فورسز دہشت گردی کے خلاف قربانیاں دے رہی ہیں اور حکومت ڈنکے کی چوٹ پر کہتی ہے کہ دہشت گردوں کا مکمل خاتمہ کیا جائے گا۔
وزیر اطلاعات نے وزیراعلیٰ خیبرپختونخوا سہیل آفریدی کو بھی تنقید کا نشانہ بناتے ہوئے کہا کہ وہ تحریک انصاف میں اپنی ساکھ کھو چکے ہیں اور ان کی بزدلی اور سیاسی نااہلی ثابت ہو چکی ہے۔
عطاء اللہ تارڑ کے مطابق سہیل آفریدی کے پاس اب کچھ نہیں رہا اور وہ اپنی سیاسی ساکھ مکمل طور پر کھو چکے ہیں۔ ان کا کہنا تھا کہ خیبرپختونخوا کے وزیراعلیٰ کی ایسی سیاسی کمزوری پہلے کبھی دیکھنے میں نہیں آئی۔
واضح رہے کہ نیوز کانفرنس میں وزیراعظم کے کوآرڈینیٹر برائے خیبرپختونخوا اختیار ولی بھی موجود تھے۔ نیوز کانفرنس میں فلسطین، کشمیر، پاک امریکا تعلقات، ایران کے ساتھ ثالثی، دہشت گردی اور پی ٹی آئی کے 27 ستمبر کے مارچ سمیت مختلف امور پر حکومتی مؤقف پیش کیا گیا۔
