راولپنڈی کے علاقے نیو ٹاؤن میں پولیس مقابلہ، ایک مبینہ ملزم زخمی حالت میں گرفتار
راولپنڈی: تھانہ نیو ٹاؤن کے علاقے میں پولیس اور مبینہ مسلح ملزمان کے درمیان مقابلہ ہوا، جس کے نتیجے میں ایک مبینہ ملزم زخمی حالت میں گرفتار کر لیا گیا، جبکہ اس کا ساتھی فرار ہونے میں کامیاب ہوگیا۔
ابتدائی اطلاعات کے مطابق تھانہ نیو ٹاؤن کی حدود میں پولیس اور مبینہ طور پر مسلح ملزمان کے درمیان فائرنگ کا تبادلہ ہوا۔ پولیس کارروائی کے دوران ایک ملزم زخمی ہوگیا، جسے گرفتار کر لیا گیا۔
ذرائع کے مطابق گرفتار ملزم کی شناخت جہانگیر خان، سکنہ چارسدہ کے نام سے ہوئی ہے، جبکہ اس کے فرار ہونے والے ساتھی کی شناخت فیضان خان، سکنہ چارسدہ کے طور پر کی گئی ہے۔
پولیس کی جانب سے واقعے کی مزید تحقیقات جاری ہیں جبکہ گرفتار ملزم کے سابقہ مجرمانہ ریکارڈ اور فرار ہونے والے ساتھی کی گرفتاری کے لیے بھی معلومات اکٹھی کی جا رہی ہیں۔
پولیس حکام سے واقعے کی مزید تفصیلات سامنے آنے کے بعد صورتحال مزید واضح ہو سکے گی۔
