معروف سائنسدان ڈاکٹر امیر محمد انتقال کرگئے، قومی سائنس و زرعی تحقیق کا بڑا نام رخصت
لاہور: پاکستان کے ممتاز سائنسدان، زرعی ماہر اور قومی سطح پر اہم اداروں کی تعمیر و ترقی میں نمایاں کردار ادا کرنے والے ڈاکٹر امیر محمد انتقال کرگئے۔ ان کی نماز جنازہ 23 اگست کو لاہور کے سکھ چین گارڈنز کی گرینڈ مسجد میں نماز عشاء کے وقت ادا کی گئی۔
مرحوم ڈاکٹر امیر محمد نے پاکستان کی سائنس، زرعی تحقیق، تعلیم اور ٹیکنالوجی کے شعبوں میں طویل عرصے تک خدمات انجام دیں۔ وہ پاکستان ایگریکلچرل ریسرچ کونسل (PARC) کے بانی چیئرمین، وفاقی سیکرٹری وزارت زراعت، صدرِ مملکت کے مشیر اور زرعی یونیورسٹی فیصل آباد کے وائس چانسلر سمیت اہم عہدوں پر فائز رہے۔
ڈاکٹر امیر محمد نے 1978 سے 1990 تک پاکستان ایگریکلچرل ریسرچ کونسل کے بانی چیئرمین کی حیثیت سے خدمات انجام دیں اور ملک میں زرعی تحقیق کے ادارہ جاتی ڈھانچے کو مضبوط بنانے میں اہم کردار ادا کیا۔
وہ پاکستان اکیڈمی آف سائنسز کے صدر بھی رہے اور 1992 سے 1996 تک اس منصب پر خدمات انجام دیں۔ بعد ازاں انہوں نے تعلیم اور انسانی وسائل کی ترقی کے شعبے میں بھی نمایاں کردار ادا کیا۔
ڈاکٹر امیر محمد نیشنل یونیورسٹی آف کمپیوٹر اینڈ ایمرجنگ سائنسز (FAST) کے بانی ریکٹر اور بورڈ آف گورنرز کے چیئرمین بھی رہے۔ ان کی قیادت میں ادارے نے پاکستان میں کمپیوٹر سائنس اور آئی ٹی کی تعلیم کے فروغ میں اہم مقام حاصل کیا۔
مرحوم نے پنجاب یونیورسٹی اور آکسفورڈ یونیورسٹی سے تعلیم حاصل کی۔ انہیں سائنس، زراعت، تعلیم اور قومی ترقی کے شعبوں میں ان کی خدمات، بصیرت، دیانت داری اور سادگی کے باعث قدر کی نگاہ سے دیکھا جاتا تھا۔
ان کے سابق رفقائے کار کے مطابق ڈاکٹر امیر محمد ایک استاد، سرپرست اور رہنما کی حیثیت سے بھی انتہائی قابل احترام تھے۔ پاکستان ایگریکلچرل ریسرچ کونسل سے وابستہ رہنے والے ڈاکٹر سید غضنفر عباس نے اپنے تعزیتی پیغام میں انہیں ایک رہنما اور مشعلِ راہ قرار دیتے ہوئے ان کی قومی خدمات کو خراج عقیدت پیش کیا۔
ذرائع کے مطابق ڈاکٹر امیر محمد نے طویل عمر پائی اور آخری عمر تک اچھی صحت کے ساتھ زندگی گزاری۔ ان کے قریبی حلقوں کے مطابق صاحبزادے ڈاکٹر پرویز امیر کے انتقال کے بعد انہیں شدید صدمہ پہنچا تھا۔
مرحوم کے اہل خانہ نے عزیز و اقارب اور احباب سے دعائے مغفرت کی درخواست کی ہے۔ تعزیت کے لیے سکھ چین گارڈنز لاہور کے مکان نمبر 20-G پر آمد کی جا سکتی ہے۔
اللہ تعالیٰ مرحوم ڈاکٹر امیر محمد کی مغفرت فرمائے، درجات بلند کرے اور لواحقین کو صبر جمیل عطا فرمائے۔ آمین۔
