ایران کے وزیر داخلہ اسکندر مومنی جو پاکستان کے سرکاری دورے پر ہیں، وزیراعظم ہاؤس میں وزیراعظم محمد شہبازشریف سے ملاقات کی۔
اس موقع پر نائب وزیراعظم و وزیر خارجہ سینیٹر محمد اسحاق ڈار، وزیر داخلہ و انسداد منشیات سید محسن رضا نقوی، وزیر اطلاعات عطاء اللہ تارڑ، وزیراعظم کے مشیر ڈاکٹر سید توقیر شاہ، وزیر مملکت برائے داخلہ طلال چوہدری اور دیگر اعلیٰ سرکاری حکام بھی موجود تھے۔
ملاقات کے دوران وزیراعظم نے ایرانی وزیر داخلہ اور ان کے وفد کا پاکستان میں خیرمقدم کیا۔ رہبر معظم آیت اللہ سید علی خامنہ ای کی نماز جنازہ میں شرکت کے لیے اس ماہ کے اوائل میں تہران کے اپنے دورے کو یاد کرتے ہوئے، وزیراعظم نے رہبر معظم سید مجتبیٰ حسینی خامنہ ای اور صدر ڈاکٹر مسعود پیزشکیان کے لیے اپنے احترام اور نیک خواہشات کا اظہار کیا۔
وزیراعظم نے خلیجی خطے میں حالیہ کشیدگی پر اپنی گہری تشویش کا اظہار کیا اور تمام فریقین پر زور دیا کہ وہ تحمل کا مظاہرہ کریں اور ایسے اقدامات سے گریز کریں جو خطے کو مزید عدم استحکام کا شکار کر سکتے ہیں۔ اس بات پر زور دیتے ہوئے کہ پاکستان ایک ایماندار اور مخلص ثالث اور سہولت کار کے طور پر اپنا کردار ادا کرتا رہے گا، وزیر اعظم نے علاقائی امن اور استحکام کے لیے پاکستان کے مضبوط عزم کا اعادہ کیا۔
وزیر داخلہ اسکندر مومنی نے اسلام آباد میں ان کے اور ان کے وفد کے پرتپاک استقبال پر وزیراعظم کا شکریہ ادا کیا۔ انہوں نے ایرانی قیادت کی جانب سے مبارکباد اور نیک خواہشات کا اظہار کیا۔ انہوں نے کہا کہ وہ دو طرفہ تعلقات کو بڑھانے کے لیے اعلیٰ سرکاری حکام کے وفد کی قیادت کر رہے ہیں۔
ایرانی وزیر نے وزیر اعظم، نائب وزیر اعظم اسحاق ڈار اور فیلڈ مارشل سید عاصم منیر کی انتھک ثالثی کی کوششوں پر گہری تعریف کا اظہار کیا جس کی وجہ سے اسلام آباد میں مفاہمت کی یادداشت طے پائی۔ انہوں نے سپریم لیڈر مرحوم آیت اللہ سید علی خامنہ ای کی نماز جنازہ میں شرکت کے لیے وزیراعظم کے دورہ تہران پر بھی شکریہ ادا کیا۔
