مریم نواز کے کرپشن کے خاتمے کے ویژن کے تحت اٹک جیل میں کارروائی، سپرنٹنڈنٹ جیل رشوت کے لفافے سمیت گرفتار
راولپنڈی: وزیراعلیٰ پنجاب مریم نواز کے کرپشن کے خاتمے کے ویژن کے تحت محکمہ جیل خانہ جات پنجاب نے اٹک جیل میں کارروائی کرتے ہوئے سپرنٹنڈنٹ جیل کو مبینہ طور پر رشوت کی رقم پر مشتمل لفافے سمیت رنگے ہاتھوں گرفتار کروا دیا۔
آئی جی جیل خانہ جات پنجاب کے مطابق کارروائی کے دوران سپرنٹنڈنٹ جیل اٹک کو رشوت لیتے ہوئے گرفتار کیا گیا۔ ان کا کہنا تھا کہ محکمہ جیل خانہ جات میں کرپشن اور بدعنوانی کے خلاف زیرو ٹالرنس پالیسی پر عملدرآمد جاری ہے۔
آئی جی جیل خانہ جات پنجاب نے واضح کیا کہ کسی بھی افسر یا اہلکار کو قانون سے بالاتر نہیں سمجھا جائے گا اور بدعنوانی میں ملوث عناصر کے خلاف بلاامتیاز کارروائی کی جائے گی۔
آئی جی جیل پنجاب کو رشوت دینے کی کوشش کرنے والا سپرنٹنڈنٹ ڈسٹرکٹ جیل اٹک رنگے ہاتھوں گرفتار، پانچ اکتوبر کو رات تقریباً 10 بجے، سپرنٹنڈنٹ ڈسٹرکٹ جیل اٹک عمران نوید اشرف بھرتھ اچانک آئی جی جیل خانہ جات پنجاب میاں سالک جلال کی رہائش گاہ پر ملاقات کے لیے آئے،ملاقات کے دوران ڈسٹرکٹ جیل اٹک کے سیکیورٹی،سیفٹی اور دیگر انتظامی امور پر گفتگو ہوئی،جس کے بعد وہ بظاہر وہاں سے روانہ ہو گئے،تاہم اس واقعے کا سب سے اہم اور سنسنی خیز موڑ اس وقت آیا جب روانگی کے تقریباً دو منٹ بعد سپرنٹنڈنٹ ڈسٹرکٹ جیل اٹک واپس آئے، انہوں نے کسی اہم معاملے پر بات کرنے کی خواہش ظاہر کی، جب آئی جی جیل خانہ جات ڈرائنگ روم میں تشریف لائے، تو عمران نوید اشرف بھرتھ نے مبینہ طور پر نوٹوں سے بھرا ہوا ایک لفافہ براہ راست ان کی میز پر رکھ دیا،آئی جی جیل خانہ جات پنجاب میاں سالک جلال نے پیشہ ورانہ اور اصول پسندانہ طرز عمل اپناتے ہوئے فوری طور پر اس پیشکش کو ٹھکرایا اور رشوت کی رقم قبول کرنے سے سخت انکار کر دیا، انہوں نے لمحہ ضائع کیے بغیر اس سارے واقعے کی اطلاع فوری طور پر سیکرٹری ہوم پنجاب کو دی، بعد ازاں، اینٹی کرپشن اسٹیبلشمنٹ پنجاب کو فوری کارروائی کے لیے باضابطہ طور پر مطلع کیا گیا،اطلاع ملتے ہی اینٹی کرپشن حکام نے فوری اور برق رفتار کارروائی عمل میں لاتے ہوئے سپرنٹنڈنٹ ڈسٹرکٹ جیل اٹک عمران نوید اشرف بھرتھ کو رشوت کے لفافے سمیت موقع پر ہی رنگے ہاتھوں گرفتار کر لیا، اینٹی کرپشن اسٹیبلشمنٹ پنجاب کی جانب سے مزید قانونی کارروائی اور تفتیش کا سلسلہ جاری ہے، سیکرٹری داخلہ حکومت پنجاب نے سپرنٹنڈنٹ ڈسٹرکٹ جیل اٹک عمران نوید اشرف بھرتھ کو گرفتاری کے بعد 9 دن کے لیے معطل کر کے پیڈا ایکٹ کاروائی کے احکامات بھی جاری کیے ہیں۔
