یورپی یونین کے وفود کی افغان وزرائے تجارت اور داخلہ سے ملاقاتیں، اقتصادی تعاون، سیکیورٹی اور علاقائی استحکام پر تبادلہ خیال
کابل: افغانستان میں یورپی یونین کے اعلیٰ حکام نے افغان حکومت کے وزرائے تجارت اور داخلہ سے الگ الگ ملاقاتیں کیں، جن میں اقتصادی تعلقات کے فروغ، سرمایہ کاری، انسانی امداد، سیکیورٹی صورتحال، افغان مہاجرین کی وطن واپسی اور افغانستان و پاکستان کے درمیان مسائل کے حل پر تبادلہ خیال کیا گیا۔
افغان خبر رساں ادارے الامارہ کے مطابق افغانستان کے وزیرِ تجارت قاری دین محمد حنیف سے افغانستان میں یورپی یونین کے سربراہ نیکولا بلومو نے وفد کے ہمراہ ملاقات کی۔ اس موقع پر اقتصادی تعلقات مستحکم بنانے، ترقیاتی تعاون بڑھانے اور افغانستان میں غیر ملکی سرمایہ کاری راغب کرنے کے امور زیرِ بحث آئے۔
قاری دین محمد حنیف نے یورپی یونین کو افغانستان میں انسانی امداد اور ترقیاتی پروگراموں کا اہم معاون قرار دیتے ہوئے تعاون میں توسیع پر زور دیا۔ انہوں نے اقتصادی پابندیاں ختم کرنے کا مطالبہ کیا اور یورپی یونین پر زور دیا کہ وہ یورپی سرمایہ کاروں کو افغانستان میں سرمایہ کاری کی ترغیب دے۔
یورپی یونین کے سربراہ نیکولا بلومو نے کہا کہ افغانستان بدستور یورپی یونین کی توجہ کا مرکز ہے۔ انہوں نے افغان عوام کی ضروریات پوری کرنے اور باہمی تعاون کے نئے مواقع تلاش کرنے کی اہمیت پر زور دیا۔
دوسری جانب افغانستان کے وزیرِ داخلہ خلیفہ سراج الدین حقانی سے افغانستان کے لیے یورپی یونین کے خصوصی ایلچی ٹامس نکلسن اور ان کے وفد نے ملاقات کی۔ ملاقات میں افغانستان اور یورپی یونین کے تعلقات، ملک کی سیکیورٹی صورتحال، علاقائی استحکام اور منشیات کے خلاف اقدامات پر گفتگو ہوئی۔
ملاقات میں افغان مہاجرین کی صورتحال اور ان کی وطن واپسی کے معاملات بھی زیرِ بحث آئے۔ اس کے علاوہ انسانی ہمدردی کے امور اور افغانستان و پاکستان کے درمیان مسائل کے حل کے لیے علاقائی کوششوں کی اہمیت پر تبادلہ خیال کیا گیا۔
ان ملاقاتوں میں اقتصادی تعاون، انسانی امداد اور علاقائی مسائل کے حوالے سے یورپی یونین اور افغان حکام کے درمیان رابطوں کی اہمیت نمایاں رہی۔
