صدر پزشکیان: ایران اور پاکستان علاقائی صلاحیتوں کو بروئے کار لا کر اپنی ضروریات پوری کر سکتے ہیں
تہران، ارنا – ایرانی صدر مسعود پزشکیان نے ایران اور پاکستان کو “خطے کے دو ایسے طاقتور ممالک” قرار دیا ہے جو “بڑی انسانی صلاحیتوں اور وافر وسائل” کے حامل ہیں۔
صدر پزشکیان نے یہ بات پیر کے روز پاکستان کے دورے پر آئے ہوئے وزیر داخلہ محسن نقوی کے ساتھ ملاقات کے دوران کہی۔
ایرانی صدر نے ملاقات کے دوران کہا کہ “اگر ہم ان صلاحیتوں کو یکجا کریں اور باہمی تعاون کا ہاتھ بڑھائیں، تو ہم ملکی اور علاقائی وسائل پر انحصار کرتے ہوئے اپنی بہت سی ضروریات پوری کر سکتے ہیں۔”
انہوں نے کہا کہ گزشتہ مہینوں کے دوران ایران اور پاکستان کی حکومتوں کے اعلیٰ حکام کے درمیان مسلسل ملاقاتیں، خطے میں امریکہ کی بڑھتی ہوئی مداخلت کے باوجود مسلم ممالک کے مابین مسلسل رابطوں کی واضح علامت ہیں۔
ایرانی صدر نے دونوں ممالک کے مختلف شعبوں کے درمیان مشترکہ سرمایہ کاری اور قریبی تعلقات کی اہمیت پر زور دیتے ہوئے کہا کہ اقتصادی تعاون کی راہ ہموار کرنے اور باہمی رابطوں کو وسعت دینے سے تہران اور اسلام آباد کے تعلقات مزید مستحکم ہو سکتے ہیں۔
دوسری جانب محسن نقوی نے کہا کہ ایران اور پاکستان کے تعلقات اس سے قبل کبھی اتنی بلندی پر نہیں رہے اور اسلام آباد تمام شعبوں میں تہران کے ساتھ تعلقات اور تعاون کو مزید فروغ دینے اور بڑھانے کے لیے پرعزم ہے۔
