برسلز:
چیئرمین کشمیرکونسل ای یو علی رضا سید نے شہدائے جموں کو زبردست خراج عقیدت پیش کرتے ہوئے کہاہے کہ جموں کے شہداء نے اپنی جانوں کا نذرانہ پیش کرکے قربانی کی عظیم مثال قائم کی اور پورے خطہ جموں و کشمیر میں جذبہ حریت کو بھرپور انداز میں اجاگر کیا۔
یورپی ہیڈکوارٹر برسلز سے جاری ہونے والے اپنے بیان میں چیئرمین کشمیرکونسل ای یو نے کہاکہ ہم شہدائے جموں کو ہرگز فراموش نہیں کرسکتے جنہوں نے اپنی جانیں پیش کرکے جموں و کشمیرکے لوگوں کی ہمت و حوصلے کو مزید مضبوط کیا۔ شہدائے کشمیر کی یہ قربانیاں آزادی کے لیے جدوجہد کرنے والوں کشمیریوں کے لیے آج بھی مشعل راہ ہیں۔
علی رضا سید نے کہاکہ ۶ نومبر ۱۹۴۷ء کو جموں کے شہداء سے لے کر ابتک تمام شہدائے خطہ جموں و کشمیر نے اپنے خون سے تحریک آزادی کشمیر کی آبیاری کی ہے۔
انہوں نے کہاکہ کشمیریوں کی جدوجہد آزادی کی سات دہائیوں سے زائد مدت سے جاری تاریخ جذبہ ایثار اور عظیم قربانیوں سے بھری ہوئی ہے اور مقبوضہ کشمیرکے لوگ آج تک آزادی کے عظیم مقصد کے لئے جدوجہد کررہے ہیں۔ اگرچہ بھارت کے انسانیت سوز مظالم دن بدن بڑھ رہے ہیں لیکن یہ مظالم غیور کشمیریوں کے جذبہ حریت کو ہرگز کم نہیں کرسکتے۔
چیئرمین کشمیرکونسل ای یو نے کہاکہ تحریک آزادی کشمیر لاکھوں شہدا کے خون سے لکھی گئی ہے اور ہم شہدا کی تحریک کو منطقی انجام تک پہنچا کر رہیں گے۔
انہوں نے کہا کہ ہم مقبوضہ کشمیر میں بڑھتے ہوئے انسانیت سوز مظالم کو عالمی فورموں پر اٹھا رہے ہیں۔
انہوں نے کہاکہ بھارتی فورسز نے بے دردی سے کشمیریوں کا قتل عام جاری رکھا ہوا ہے لیکن اس ظلم و ستم اور انسانی حقوق کی سنگین خلاف ورزیوں پر دنیا کی خاموشی حیران کن ہے۔
چیئرمین کشمیر کونسل ای یو علی رضا سید نے کہاکہ ہم بھارت کے اس ظالمانہ رویے پر خاموش نہیں بیٹھیں گے بلکہ مقبوضہ کشمیر کے مظلوم عوام کو انصاف ملنے تک اپنی سفارتی کوششیں جاری رکھیں گے۔ ہم عالمی برادری بشمول اقوام متحدہ اور یورپی یونین سے مطالبہ کرتے ہیں کہ وہ مقبوضہ کشمیر میں انسانی حقوق کی گھمبیرصورتحال کا نوٹس لیں اور مسئلہ کشمیر کے پرامن حل کے لیے اپنا مؤثر کردار ادا کرے۔
