بزنس ریکارڈر گروپ کے ڈپٹی چیف ایگزیکٹو ارشد زبیری طویل علالت کے بعد انتقال کرگئے۔
معرف صحافی اور اکنامک جنرلزم کے پائینیر ارشد زبیری 72 سال کی عمر میں کراچی میں انتقال کرگئے، ارشد زبیری طویل عرصے سے علیل تھے۔ پسماندگان میں ان کی اہلیہ اور 3 بچے ہیں۔ ارشد زبیری کی نماز جنازہ کل دوپہر ڈیڑھ بجے مسجد نورالسلام زمزمہ پارک ڈیفنس میں ادا کی جائے گی۔
ارشد زبیری نے 1973 میں امریکا سے مکینیکل انجینئرنگ میں بی ایس کی ڈگری حاصل کی اور 1974 میں ٹیکنیکل ڈائریکٹر کی حیثیت سے اپیکس پرنٹری میں شمولیت اختیار کی۔
1981 میں ڈیلی بزنس ریکارڈر کے پرنٹر اور پبلشر بن گئے، 1983 میں انہیں یہ ذمہ داری سونپی گئی کہ وہ خبر کی ترتیب کو ہاٹ میٹل سے کولڈ سیٹ کمپیوٹرائزڈ فلم سیٹ میں تبدیل کریں۔
پاکستان میں بزنس اور فنانشل جرنلزم کے بانی اور ان کے مرحوم والد جناب ایم اے زبیری کی جانب سے قائم کردہ بزنس ریکارڈر ارشد زبیری کی قیادت میں کئی گنا ترقی کر چکا ہے۔
کنٹرولڈ معیشت کو ڈی ریگولیٹ کرنے اور آزاد بنانے میں ان کے اداریوں کا بڑا کردار رہا ۔ انہوں نے 2010 سے 2013 تک ایف بی آر کے ٹیکس ریفارم کوآرڈینیشن (ٹی آر سی) کے رکن کی حیثیت سے خدمات انجام دیں
