کابل (بی این اے) افغان وزیر خارجہ مولوی امیر خان متقی سے کل یورپی یونین کے خصوصی نمائندے برائے افغانستان تھامس نکلسن نے ان کے دفتر میں ملاقات کی۔
ملاقات میں یورپی نمائندۀ خصوصی تھامس نکولسن نے امارت اسلامیہ افغانستان کے نمائندوں کی تیسرے دوحہ اجلاس میں شرکت کی اہمیت پر زور دیا، جس کے دوران اہم امور پر تبادلہ خیال کیا جائے گا۔
انہوں نے دوحہ اجلاس کے متعلق افغان وزیر خارجہ کو اپنے مشاہدات سے بھی آگاہ کیا۔
افغان وزیر خارجہ نے اس ملاقات میں کہا کہ انہوں نے اقوام متحدہ کی ڈپٹی سیکرٹری جنرل روزمیری ڈی کارلو سے مفید بات چیت کی۔
امیرخان متقی نے مزید کہا کہ امارت اسلامیہ دوحہ اجلاس کے طریقہ کار کی تحقیقات کر رہی ہے اور اس پر اپنے موقف کا اعلان کرے گی۔
یاد رہے کہ افغان وزیرخارجہ نے اس ملاقات میں واضح کیا کہ امارت اسلامیہ کی پالیسی دنیا کے تمام ممالک کے ساتھ متوازن اور مثبت تعامل پر مبنی ہے اور دوحہ اجلاس میں بامعنی شرکت کی خواہش رکھتی ہے جس کا نتیجہ افغان عوام اور ملک کی خوشحالی کا باعث بنے۔
انہوں نے مزید کہا کہ افغانستان میں 45 سال کی جنگ اور تباہی کے بعد مکمل امن قائم ہوا ہے اور مختلف شعبوں میں اہم مثبت کامیابیاں حاصل کی ہیں۔
