لاہور: لاہور کے علاقے ڈیفنس سی میں دو غیر ملکی خواتین کی جانب سے سنگین الزامات پر مشتمل درخواست پولیس کو موصول ہوئی ہے، جس میں ایک پاکستانی شہری سمیت پانچ افراد پر مبینہ طور پر اغوا، جنسی زیادتی، تشدد، بھتہ خوری اور جان سے مارنے کی دھمکیاں دینے کے الزامات عائد کیے گئے ہیں۔

پولیس کی ابتدائی رپورٹ کے مطابق، شکایت کنندگان نے مؤقف اختیار کیا ہے کہ وہ اکتوبر 2025 میں لاہور میں ایک پاکستانی شہری محمد رضا ڈار سے ملیں، جس نے انہیں پاکستان آنے کی دعوت دی اور ویزوں کے انتظامات کیے۔ درخواست میں الزام لگایا گیا ہے کہ 29 جون کو انہیں مبینہ طور پر اغوا کیا گیا، قید میں رکھا گیا، لاکھوں روپے تاوان طلب کیا گیا اور تشدد کا نشانہ بنایا گیا۔

درخواست میں مزید الزام عائد کیا گیا ہے کہ دو خواتین میں سے ایک کو متعدد مرتبہ جنسی زیادتی کا نشانہ بنایا گیا، جبکہ دوسری خاتون کے ساتھ بھی مبینہ طور پر جنسی حملے اور جسمانی تشدد کی کوشش کی گئی۔ متاثرہ خواتین نے الزام لگایا کہ ملزمان انہیں دھمکیاں دیتے رہے اور رقم نہ دینے کی صورت میں مزید نقصان پہنچانے کی دھمکیاں دیں۔

پولیس رپورٹ کے مطابق، درخواست تعزیراتِ پاکستان کی دفعات 365-A اور 375-A کے تحت موصول ہوئی ہے۔ ابتدائی جانچ کے بعد متعلقہ تھانے کے ایس ایچ او کو قانون کے مطابق کارروائی اور مقدمہ درج کرنے کے لیے رپورٹ ارسال کر دی گئی ہے۔

پولیس کا کہنا ہے کہ واقعے کی تحقیقات جاری ہیں اور تمام الزامات کی قانونی تقاضوں کے مطابق جانچ کی جائے گی۔

نوٹ: یہ خبر پولیس کو دی گئی درخواست اور ابتدائی رپورٹ پر مبنی ہے۔ الزامات ابھی تحقیقاتی مرحلے میں ہیں اور کسی بھی ملزم کے خلاف جرم عدالت میں ثابت ہونا باقی ہے۔