برسلز: انڈو۔پیسیفک فورم میں وزیرخارجہ اسحاق ڈار کی کشمیریوں کی حمایت قابل ستائش ہے، علی رضا سید
برسلز (پ۔ر)
چیئرمین کشمیرکونسل ای یو علی رضا سید نے کہاہے کہ انڈو۔پیسفیک کے وزارتی فورم سے خطاب کے دوران نائب وزیراعظم/وزیر خارجہ، سینیٹر محمد اسحاق ڈار نے کھل کر کشمیر پر بات کی ہے اور یہ واضح کیا ہے کہ مسئلہ کشمیر کے حل کے بغیر خطے میں پائیدار امن قائم نہیں ہوسکتا۔
نائب وزیراعظم/وزیر خارجہ، سینیٹر محمد اسحاق ڈار، جو اس وقت برسلز کے سرکاری دورے پر ہیں، نے چوتھے یورپی یونین انڈو پیسیفک وزارتی فورم سے خطاب کیا۔ انہوں نے کہا کہ ہم سمجھتے ہیں کہ کشمیری عوام کی امنگوں کے مطابق دہائیوں پرانے مسئلہ کشمیر کے پرامن حل کے بغیر جنوبی ایشیا میں پائیدار امن حاصل نہیں کیا جا سکتا۔ یورپی یونین کے اعلیٰ نمائندہ/نائب صدر برائے خارجہ امور اور سیکیورٹی پالیسی مس کجا کالس نے سینیٹر اسحاق ڈار کو پاکستان-ای یو اسٹریٹجک ڈائیلاگ کے ساتویں اجلاس کی شریک صدارت کے لیے بھی مدعو کیا تھا۔
چیئرمین کشمیرکونسل ای یو علی رضا سید نے اسحاق ڈٓار کے کشمیر کے حوالے سے بیان پر مثبت ردعمل ظاہر کرتے ہوئے کہاکہ سینیٹر اسحاق ڈار نے انڈو پیسیفک کے وزارتی فورم سے ستر ممالک کے نمائندوں کی موجودگی میں کھل کر مسئلہ کشمیر پر بات کی۔
خاص طور پر اسحاق ڈار نے کہاکہ جب تک مسئلہ کشمیر کشمیری عوام کی امنگوں کے مطابق حل نہیں ہوتا، اس وقت تک جنوبی ایشیا میں پائیدار امن برقرار نہیں ہوسکتا۔ اسحاق ڈار نے کشمیر کے حوالے سے سچائی پر مبنی موقف پیش کیا ہے اور کشمیریوں کے حقوق کا دفاع کیا ہے۔
چیئرمین کشمیرکونسل ای یو نے اسحاق ڈار کے انڈو پیسفیک اجلاس سے خطاب کا گہرا اثر پڑے گا اور اس طرح دنیا کے سامنے مسئلہ کشمیر کی حقیقت ایک بار پھر آشکار ہوگی۔ علی رضا سید نے کہاکہ بھارت کے کشمیریوں پر مظالم دن بدن بڑھ رہے ہیں اور دنیا نے بھارت کے ظلم و ستم کے بارے میں جاننا شروع کردیا ہے۔
علی رضا سید نے زور دے کر کہا کہ جنوبی ایشیا میں اصل مسئلہ بھارت کی جانب سے مقبوضہ کشمیر میں انسانی حقوق کی پامالی اور دہائیوں سے التواء میں پڑا ہوا کشمیر کا تنازع ہے۔ کشمیریوں پر بھارتی ظلم و جبر بھارتی ریاستی دہشت گردی ہے اور بھارت کشمیری عوام کو حق خودارادیت دینے سے انکار کررہاہے۔
چیئرمین کشمیر کونسل ای یو نے واضح کیا کہ مسئلہ کشمیر بھارت اور پاکستان کے مابین کوئی دو طرفہ معاملہ یا علاقائی تنازعہ نہیں بلکہ بین الاقوامی سطح پر ایک تسلیم شدہ مسئلہ ہے۔ دنیا کو یاد رکھنا چاہیے کہ بھارت نے کشمیری عوام سے حق خودارادیت کا وعدہ کیا تھا، جو آج تک پورا نہیں کیا گیا۔ اس مسئلے پر اقوام متحدہ کی سلامتی کونسل کی قراردادیں موجود ہیں۔
انہوں نے مطالبہ کیا کہ عالمی برادری بھارت پر دباؤ ڈالے تاکہ وہ کشمیریوں کے ساتھ اپنے وعدے کو پورا کرے اور کشمیریوں کے بنیادی حقوق کا احترام کرے۔
علی رضا سید نے کہاکہ مقبوضہ کشمیر میں کئی سیاسی رہنماﺅں اور کارکنوں کو جبراً نظربند یا قید کیا گیا ہے، جبکہ انسانی حقوق کے کارکنوں اور صحافیوں پر سخت پابندیاں عائد کی گئی ہیں اور ان میں سے بھی متعدد زیرحراست ہیں۔
انہوں نے کہاکہ مسئلہ کشمیر پرامن طریقے سے اور کشمیریوں کی خواہشات کے مطابق جلد از جلد حل ہونا چاہیے۔
