برسلز: شہدائے جموں نے اپنے خون سے تحریک آزادی کی آبیاری کی ہے، چیئرمین کشمیرکونسل ای یو علی رضا سید
برسلز:
چیئرمین کشمیرکونسل ای یو علی رضا سید نے شہدائے جموں کو زبردست خراج عقیدت پیش کرتے ہوئے کہاہے کہ جموں کے شہداء نے اپنی جانوں کا نذرانہ پیش کرکے قربانی کی عظیم مثال قائم کی اور پورے خطہ جموں و کشمیر میں جذبہ حریت کو بھرپور انداز میں اجاگر کیا۔
یورپی ہیڈکوارٹر برسلز میں کشمیرکونسل ای یو کے مرکزی سیکرٹریٹ میں شہدائے جموں کے حوالے سے ایک اجلاس سے خطاب کرتے ہوئے چیئرمین کشمیرکونسل ای یو علی رضا سید نے مزید کہا کہ ہم شہدائے جموں کو ہرگز فراموش نہیں کرسکتے جنہوں نے اپنی جانیں پیش کرکے جموں و کشمیرکے لوگوں کی ہمت و حوصلے کو مزید مضبوط کیا۔
اجلاس میں چیئرمین کشمیرکونسل ای یو علی رضا سید کے علاوہ، جن دیگر شخصیات نے گفتگو کی یا وہ اجلاس میں شریک ہوئیں، ان میں خالد راجہ، فرید خان، راؤمستجاب، ڈٓاکٹر منظورظہور اور شیخ ماجد قابل ذکر ہیں۔
یاد رہے کہ چھ نومبر ۱۹۴۷ء کو ڈوگرہ حکمران کی فوج نے جموں کے علاقے میں لاکھوں کشمیری مسلمانوں کو بے دردی سے قتل کردیا تھا۔ اس افسوسناک سانحہ کی یاد میں کشمیری ہر سال چھ نومبر کو یوم شہدائے جموں مناتے ہیں۔
علی رضا سید نے کہاکہ شہدائے کشمیر کی قربانیاں آزادی کے لیے جدوجہد کرنے والے کشمیریوں کے لیے مشعل راہ ہیں۔
انہوں نے مقبوضہ کشمیر میں جاری بھارتی مظالم کی سخت الفاظ میں مذمت کی اور ان مظالم کو روکنے، تمام کشمیری اسیروں کی رہائی اور جموں و کشمیر سے بھارتی فوجوں کے فوری انخلا کا مطالبہ کیا۔
انہوں نے مزید کہاکہ ۶ نومبر ۱۹۴۷ء کو جموں کے شہداء سے لے کر ابتک تمام شہدائے خطہ جموں و کشمیر نے اپنے خون سے تحریک آزادی کشمیر کی آبیاری کی ہے۔
انہوں نے کہاکہ کشمیریوں کی جدوجہد آزادی کی تاریخ جذبہ ایثار اور عظیم قربانیوں سے بھری ہوئی ہے اور مقبوضہ کشمیرکے لوگ آزادی کے عظیم مقصد کے لئے مسلسل جدوجہد کررہے ہیں۔
چیئرمین کشمیرکونسل ای یو علی رضا سید نے کہاکہ بھارتی فورسز نےانتہائی بے دردی سے کشمیریوں کا قتل عام جاری رکھا ہوا ہے لیکن اس ظلم و ستم اور انسانی حقوق کی سنگین خلاف ورزیوں پر دنیا کی خاموشی حیران کن ہے۔
انہوں نے مسئلہ کشمیر کے پرامن حل کی ضرورت پر زور دیا اورعالمی برادری سے مطالبہ کیا کہ وہ اس سلسلے میں اپنا مؤثر کردار ادا کرے۔
دیگر مقررین نے کہاکہ ہم بھارت کے اس ظالمانہ رویے پر خاموش نہیں بیٹھیں گے بلکہ مقبوضہ کشمیر کے مظلوم عوام کو انصاف ملنے تک انکے حق میں آواز بلند کرتے رہیں گے۔ انہوں نے کہاکہ ہم عالمی برادری بشمول اقوام متحدہ اور یورپی یونین سے مطالبہ کرتے ہیں کہ وہ مقبوضہ کشمیر میں انسانی حقوق کی گھمبیرصورتحال کا نوٹس لیں اور مسئلہ کشمیر کے پرامن حل کے لیے اپنا مؤثر کردار ادا کرے۔
.
