چیئرمین پاکستان پیپلزپارٹی بلاول بھٹو زرداری نے کہا ہے کہ ہماری جماعت کی بنیاد کشمیرکازکی وجہ سےرکھی گئی تھی۔کشمیری عوام سے وعدہ کرتا ہوں کہ پیپلز پارٹی کی حکومت قائم کرکے ان کا مقدمہ بین الاقوامی سطح پر لڑوں گا
پاکستان پیپلزپارٹی۔چیئرمین بلاول بھٹو زرداری کی صدارت میں ازاد کشمیر قانون ساز اسمبلی ان ہاوس تبدیلی پر پارٹی پارلیمانی اجلاس زرداری ہاوس اسلام میں ہوا ، اجلاس کے بعد بلاول بھٹو نے میڈیا سے گفتگو کرتے ہوئے کہا کہ ہماری جماعت نے ہمیشہ کشمیر کاز کا مقدمہ لڑا۔ تین نسلوں سے کشمیریوں کا مقدمہ لڑ رہے ہیں، غیر سیاسی سوچ اور سازش کی وجہ سے کشمیر میں سیاسی خلا پیدا کیا گیا، پیپلز پارٹی واحد جماعت ہے جو کشمیر کی صحیح معنوں میں نمائندگی کر سکتی ہے۔
بلاول بھٹو زرداری کا کہنا تھا کہ پیپلزپارٹی ایک سیاسی اور جمہوری جماعت ہے، کشمیر کےعوام کی بھرپور نمائندگی کریں گے، ہماری جماعت آزادکشمیرمیں حکومت بنانےکی پوزیشن میں آگئی ہے۔
چیئرمین پیپلزپارٹی کا کہنا تھا کہ ہماری جماعت میں شمولیت اختیار کرنے والے کشمیری سیاسی رہنماوں کا شکرگزار ہوں، پاکستان پیپلزپارٹی کشمیر میں حکومت بنائے گی اور عوام کی خدمت کرے گی ۔
