افغانستان اور پاکستان کے درمیان تجارتی حجم ایک ارب ڈالر سے تجاوز کر گیا

کابل (بی این اے) افغانستان کی وزارت صنعت و تجارت کے مطابق رواں سال کے ابتدائی چھ ماہ کے دوران افغانستان اور پاکستان کے درمیان تجارتی حجم 1.108 ارب ڈالر تک پہنچ گیا ہے۔

وزارت کے ترجمان آخندزاده عبدالسلام جواد نے ایک ویڈیو پیغام میں بتایا کہ اس مدت میں افغانستان کی پاکستان کو برآمدات 304 ملین ڈالر جبکہ درآمدات 804 ملین ڈالر رہی ہیں۔ ترجمان کے مطابق پاکستان کو برآمد ہونے والی اہم اشیا میں کوئلہ، کپاس، پروسیس شدہ ٹالک، انگور، لوبیا، کھیرا، تمباکو اور دال شامل ہیں، جبکہ پاکستان سے درآمدات میں چاول، سیمنٹ، طبی ادویات، کتان کا کپڑا، مختلف ملبوسات اور آلو شامل ہیں۔

وزارت کے اعداد و شمار کے مطابق، رواں ۱۴۰۴ ہجری شمسی سال کے ابتدائی چھ ماہ میں افغانستان کی مجموعی تجارت 6.783 ارب ڈالر رہی جو گزشتہ سال کے اسی عرصے کے مقابلے میں 30٪ زیادہ ہے۔