,
برسلز: بھارت کے یوم آزادی پر برسلز میں بھارتی سفارتخانے کے باہر احتجاج کیا گیا
برسلز(پ۔ر) آج 15 اگست بروز جمعہ بھارت کے یوم آزادی یعنی کشمیریوں کے یوم سیاہ کے موقع پر بلجیئم کے دارالحکومت برسلز میں جو یورپی ہیڈ کوارٹرز بھی ہے، بھارتی سفارتخانے کے سامنے ایک بھرپور احتجاجی مظاہرہ کیا گیا۔
اس مظاہرے کا اہتمام کشمیرکونسل یورپ (ای یو) نے کیا اور مظاہرے کی قیادت کونسل کے چیئرمین علی رضا سید نے کی۔
یادرہے کہ کشمیرکے دونوں حصوں میں موجود کشمیری باشندے اور دنیاکے دوسرے خطوں میں رہنے والے ان کے ہم وطن ہرسال 15 اگست بھارت کے یوم آزادی کو احتجاجاً یوم سیاہ کے طورپر مناتے ہیں۔
آج برسلز کے مظاہرے میں کشمیریوں اور پاکستانیوں کے علاوہ کشمیریوں سے ہمدردی رکھنے والی دیگر کمیونٹیز اور سیاسی و سماجی تنظیموں کے نمائندوں اور اہم شخصیات نے بھی شرکت کی۔
مظاہرے میں شریک شخصیات میں علی رضا سید، سردار صدیق، چوہدری خالد جوشی، راؤ مستجاب، ڈاکٹر منظور ظہور، ملک اجمل، شیراز بٹ، راجہ خالد، غیاث الدین بھٹی، سید اسلم شاہ، راجہ عبدالقیوم، شازیہ اسلم اور مہرندیم قابل ذکر ہیں۔
مظاہرین نے پلے کارڈز اور بینرز اٹھا رکھے تھے جن پر کشمیریوں کے حق میں اور بھارتی مظالم کے خلاف نعرے درج تھے۔
احتجاج کرنے والوں نے بھارتی جیلوں میں قید حریت رہنماء یاسین ملک اور شبیراحمد شاہ اور انسانی حقوق کے عالمی شہرت یافتہ علمبردار خرم پرویز کی تصاویر بھی اٹھا رکھی تھیں اور مظاہرین ان سمیت تمام کشمیری اسیروں کی رہائی کا مطالبہ کررہے تھے۔
کشمیرکونسل ای یوکے چیئرمین علی رضاسید نے اس موقع پر کہاکہ ہم اس لیے احتجاج کررہے ہیں کیونکہ بھارت نے کشمیریوں پر مظالم کی انتہاکردی ہے۔ بھارت کئی دہائیوں سے کشمیر کے ایک بڑے حصے پر ناجائز قابض ہے۔ خاص طور پر گذشتہ چند سالوں سے مقبوضہ کشمیرکے عوام کے خلاف بھارتی ریاستی دہشت گردی میں اضافہ ہوا اور اسی وجہ سے مظلوم کشمیری گونا گون مشکلات کا شکار ہیں، اہم سیاسی رہنماء اور انسانی حقوق کے کارکن نظربند اور گرفتار ہیں۔ بھارت کشمیریوں کی وسیع پیمانے پر نسل کشی کررہا ہے اور نوجوانوں کو ماورائے عدالت قتل کیا جارہا ہے۔ بھارت مقبوضہ وادی میں آبادی کا تناسب تبدیل کرکے کشمیریوں کی شناخت ختم کرنے کے درپے ہے۔ دیگر مقررین نے بھی اپنی تقاریر میں مقبوضہ کشمیر میں بھارتی ظلم و ستم کے خاتمے اور مسئلہ کشمیر کے منصفانہ حل کا مطالبہ کیا۔
انہوں عالمی برادری سے اپیل کی ہے کہ وہ مقبوضہ کشمیر میں مظالم بند کروا کر مسئلہ کشمیر کے منصفانہ اور پرامن حل کے لیے کردار ادا کرے۔
Skip to content
