اسلام آباد () خواتین کے خلاف تشدد کے خاتمے کے عالمی دن کے موقع پر ایگزیکٹو ڈائریکٹر سسٹین ایبل سوشل ڈیولپمنٹ آرگنائزیشن (SSDO ) سید کوثر عباس نے اپنے بیان میں کہا کہ خواتین کے خلاف تشدد ایک عالمی مسئلہ ہے ، ان کا کہنا تھا کہ خواتین کے خلاف تشدد نہ صرف انفرادی حقوق کی پامالی ہے بلکہ یہ ہمارے معاشرے کی ترقی اور خوشحالی میں ایک بڑی رکاوٹ ہے۔ آج کے دن ہمیں یہ عہد کرنا ہوگا کہ ہم اپنے گھروں اور دفاتر میں ایسے رویوں اور اعمال کو جڑ سے ختم کریں گے جو خواتین کی عزت اور وقار کو مجروح کرتے ہیں ، سید کوثر عباس نے حکومت پر زور دیا کہ وہ خواتین کے خلاف تشدد کی روک تھام کے لیے موجود قوانین پر عمل درآمد کو یقینی بنائے اور اس حوالے سے مزید جامع پالیسیز تشکیل دیں ۔ سید کوثر عباس نے مزید کہا کہ ہم سب کو یہ سمجھنا ہوگا کہ ایک مضبوط اور پرامن معاشرہ تب ھی قائم ہو سکتا ہے جب ہم خواتین اور مردوں کے لیے یکساں مواقع، حقوق اور تحفظ فراہم کریں گے۔ صنفی برابری نہ صرف انصاف کی علامت ہے بلکہ یہ ہمارے معاشرتی استحکام کی بنیاد بھی ہے. سسٹین ایبل سوشل ڈیولپمنٹ آرگنائزیشن ( SSDO) نے شہریوں، سول سوسائٹی، سرکاری اداروں اور میڈیا سے اپیل کی کہ وہ خواتین کے خلاف تشدد کے خاتمے کے لیے اپنا کردار ادا کریں اور ان کے لیے ایک محفوظ اور باوقار ماحول پیدا کرنے میں مدد کریں۔
