اپنی چھت……اپنا گھر،15دن میں مکان تعمیر شروع،وزیراعلی پنجاب مریم نوازشریف خود معائنہ کرنے پہنچ گئیں
کوٹ لکھپت کے علاقے پنڈی راجپوتاں میں صوبیہ منیر کے گھر کی دیواروں کی تعمیر مکمل، لینٹر ڈالا جا رہا تھا
وزیراعلی مریم نوازشریف کو دیکھ کر صوبیہ منیر خوشی سے آبدیدہ،وزیراعلی نے گلے لگا لیا، بچیوں نے پھول پیش کئے
وزیراعلی مریم نوازشریف نے دوسری قسط کا چیک پیش کیا،مکان کی تعمیر مکمل ہونے پر ضروری فرنیچر بھی دیا جائے گا
وزیراعلی مریم نوازشریف کی صوبیہ منیر کی بیٹیوں، عائشہ اور طیبہ سے ملاقات، تعلیم جاری رکھنے کی ہدایت
مکان بنتا دیکھ کر بہت خوشی ہوئی، لگتاہے اپنا ہی گھر بن رہاہے، نوازشریف نے بھی سلام بھیجا:مریم نوازشریف
آپ نے میرا گھر بنایا، آپ کی محبت نے میرے دل میں گھر بنا لیا،دل سے دعائیں نکلتی ہیں:صوبیہ منیر
2اکتوبر کو چیک ملا، 15دن میں تعمیر شروع کردی، انشاء اللہ چند ماہ میں گھر بن جائے گا:صوبیہ منیر
لاہور22 اکتوبر:……”اپنی چھت ……اپنا گھر پروگرام“ کے تحت پہلی قسط کے اجرا کے 15دن کے اندر مکانو ں کی تعمیرات شروع ہوگئی-وزیراعلیٰ پنجاب مریم نوازشریف نے کوٹ لکھپت کے پنڈی راجپوتاں میں زیر تعمیر گھر کامعائنہ کرنے خود پہنچ گئیں -گھر کی دیواروں کی تعمیر مکمل ہوچکی تھی اور لینٹر ڈالنے کا عمل جاری تھا-اپنی چھت……اپنا گھر پروگرام کے لون سے گھر تعمیر کرنے والی صوبیہ منیر وزیراعلی پنجاب مریم نوازشریف کو دیکھ کر خوشگوار حیرت میں مبتلا ہوگئیں،ان کی بچیوں نے پھول پیش کئے، وزیراعلی مریم نوازشریف نے صوبیہ منیر کو گلے لگا لیا-صوبیہ منیر خوشی کے جذبات سے مغلوب آبدیدہ ہوگئیں -وزیراعلی پنجاب مریم نوازشریف نے صوبیہ منیر کو لون کی دوسری قسط کا چیک پیش کیا اور مکان کی تکمیل پرضروری فرنیچر کا تحفہ دینے کی ہدایت کی -وزیراعلی مریم نوازشریف نے صوبیہ منیر کی بیٹیوں عائشہ اور طیبہ کو پڑھائی جاری رکھنے کی تلقین کی اور کہاکہ ان کی تعلیم کے اخراجات حکومت پنجاب ادا کرے گی-وزیراعلی مریم نوازشریف نے اس موقع پر کہاکہ اپنی چھت……اپنا گھر سکیم کے تحت مکان بنتا دیکھا توہونے والی خوشی لفظوں میں بیان نہیں کرسکتی، اتنی خوش ہوں لگتا ہے اپنا ہی گھر بن رہاہے،محمد نوازشریف صاحب بھی بہت خوش ہیں، انہو ں نے سلام بھیجا او ربہت سی دعائیں دی، وزیراعلی نے کہاکہ اپنا گھر ہر شہری کا حق ہے، چاہتی ہوں کہ پنجاب میں کوئی بے گھر اپنی چھت سے محروم نہ رہے-وزیراعلی مریم نوازشریف کے دریافت کرنے پر صوبیہ منیر نے بتایا کہ وہ 23ہزار روپے ماہانہ کرایہ کے گھر میں مقیم ہیں، اب انہیں 3ماہ کے بعد صرف 14ہزار ماہانہ قسط ادا کرنا ہوگی-سنگل مدر صوبیہ منیر ایونٹ مینجمنٹ ٹیم میں ڈیکوریٹر کا کام کرتی ہیں، انہوں نے وزیراعلی مریم نوازشریف سے گفتگو کرتے ہوئے بتایا کہ آپ نے میرا گھر بنایا لیکن آپ کی محبت نے میرے دل میں گھر بنا لیا، دل سے وزیراعلی مریم نوازشریف کے لئے دعائیں نکلتی ہیں، صوبیہ منیر نے مزید بتایاکہ اشتہار دیکھ کر پورٹل سے اپلائی کیا، قرضہ مل گیا- 2اکتوبر کو چیک ملا، 15دن میں تعمیر شروع کر دی-3مرلے کا پلاٹ تھا جس پر ڈرائنگ روم، بیڈ روم، اٹیچ باتھ اور کچن کا نقشہ خود بنایا-وزیراعلی مریم نوازشریف نے صوبیہ منیر کے گھر پر کام کرنے والے ورکرزکی ٹیم کو بھی شاباش دی- سینئر منسٹر مریم اور رنگ زیب، وزیر اطلاعات و ثقافت عظمیٰ زاہد بخاری، وزیر ہاؤسنگ بلال یاسین،پرنسپل سیکرٹری ساجد ظفر ڈال، سیکرٹری پاسنگ اسد اللہ خان، کمشنر لاہور زید بن مقصود،ڈی جی پھاٹا سیف انور جپہ اور دیگر حکام بھی موجود تھے۔
