وزیر مملکت آئی ٹی شزہ فاطمہ سے سی ای او ایشیاء پیسیفک نیٹ ورک انفارمیشن سینٹر کی ملاقات
ٹیلی کام آپریٹرز کی ٹریننگ کے لیئے جامع پلان مرتب کرنے پر اتفاق؛ ٹیلی کام آپریٹرز کی استعداد کار بڑھانے کے لیئے ٹیکنیکل ٹریننگ بہت اہم ہے، شزہ فاطمہ
اسلام آباد (22 اکتوبر 2024): وزیر مملکت برائے آئی ٹی و ٹیلی کمیونیکیشن شزہ فاطمہ سے ایشیاء پیسیفک نیٹ ورک انفارمیشن سینٹر (اے پی این آئی سی)، سنگاپور کے چیف ایگزیکٹیو آفیسر (سی ای او) جیا رونگ لو نے منگل کو ان کے دفتر میں ملاقات کی۔
ملاقات میں باہمی دلچسپی کے امور اور ٹیلی کام آپریٹرز کی استعداد کار بڑھانے کے حوالے سے گفتگو ہوئی۔ اس موقع پر سیکرٹری آئی ٹی ضرار ہاشم خان بھی موجود تھے۔
سی ای او ایشیاء پیسیفک نیٹ ورک انفارمیشن سینٹر نے وزیر مملکت آئی ٹی شزہ فاطمہ کو اے پی این آئی سی کی ورکنگ کے حوالے سے بریف کیا۔
انہوں نے کہا کہ اے پی این آئی سی پاکستان میں ٹیلی کام آپریٹرز کے لیئے نیٹ ورکنگ کے حوالے سے ٹریننگ پروگرام شروع کرنا چاہتا ہے۔
وزیر مملکت آئی ٹی شزہ فاطمہ نے کہا کہ ٹیلی کام آپریٹرز کی استعداد کار بڑھانے کے لیئے ٹیکنیکل ٹریننگ بہت اہم ہے۔
ملاقات میں ٹیلی کام آپریٹرز کی ٹریننگ کے لیئے ایک جامع پلان مرتب کرنے پر اتفاق کیا گیا۔
ملاقات میں ممبر ٹیلی کام، وزارت آئی ٹی محمد جہانزیب رحیم بھی موجود تھے۔
