فرینکفرٹ: اقبال کی انقلابی شاعری نے تحریک آزادی کشمیر کو تقویت پہنچائی ہے، علی رضا سید
چیئرمین کشمیرکونسل یورپ علی رضاسید نے کہاہے کہ علامہ اقبال نے کشمیریوں کے مصائب اور مشکلات کو اپنی انقلابی شاعری میں بیان کرکے تحریک آزادی کشمیر کو بہت تقویت پہنچائی ہے۔
علی رضا سید نے ان خیالات کا اظہار گذشتہ روز جرمنی کے شہر فرینکفرٹ میں علامہ اقبال اور جرمن شاعر گوئٹے کی یاد میں ایک محفل مشاعرہ و مباحثہ سے خطاب کرتے ہوئے کیا۔
محفل کا اہتمام ہیومن رائٹس ایسوسی ایشن جرمنی نے کیا جس کی صدارت جرمنی میں پاکستان کی سفیرسیدہ ثقلین نے کی جبکہ فرینکفرٹ میں پاکستان قونصل جنرل زاہد حسین کو معزز مہمان کے طور دعوت دی گئی تھی۔ چیئرمین کشمیرکونسل یورپ علی رضا سید نے بھی اس محفل میں بطور مہمان خاص شرکت کی۔
ان کے علاوہ، پاکستان سے پروفیسر ڈاکٹر شاہد عالم، ہائیڈل برگ یونیورسٹی جرمنی کے ڈاکٹر آرلان ہوپف، پاکستان کے مشہور ٹی وی اینکر اقرارالحسن اور دیگر متعدد دانشور، شعراء اور ماہرین بھی مدعو تھے جبکہ چیئرمین ہیومن ویلفیئر ایسوسی ایشن سید اقبال حیدر نے میزبانی کے فرائض انجام دیے۔
علی رضا سید نے کہاکہ میری علامہ اقبال سے روحانی وابستگی بلاوجہ نہیں۔ علامہ بھی کشمیری تھے اور میرا تعلق بھی اُسی جنت نظیر خِطے سے ہے۔ علامہ اقبال کو کشمیر سے بے پناہ محبت تھی جس کا اظہار اُنہوں نے اپنے کلام ، خطوط اور عمل زندگی میں کئی دیگر مواقع پر کیا۔ اُنہیں اِس پر ناز تھا کہ وہ کشمیری ہیں۔
انکا فارسی کا ایک شعر بھی اس بات کااظہارہے جس کا اردو ترجمہ کچھ یوں ہے کہ ’’میرا بدن گلستان کشمیر کا ایک پھول ہے اور میرا دل ارض حجاز اور میری صدا شیراز سے ہے‘‘۔
وہ کشمیر سے محبت کا اظہار اپنے اشعار میں یوں بھی کرتے ہیں:
کشمیر کا چمن جو مجھے دلپذیر ہے
اِس باغ جاں فزا کا یہ بلبل اسیر ہے
ورثے میں ہم کو آئی ہے آدم کی جائیداد
جو ہے وطن ہمارا وہ جنت نظیر ہے
سیالکوٹ سے جب وہ لاہور پہنچے تو وہاں اُنہوں نے کشمیری مسلمانوں کی قائم کردہ تنظیم ’’انجمن کشمیری مسلمانان‘‘ میں شمولیت اختیار کی اور اس حد تک اس کے سرگرم کارکن بنے کہ اُنہیں اس انجمن کے ذمہ داران نے انجمن کا سیکرٹری جنرل بنا دیا۔
وہ 1921ء میں کشمیر گئے ۔ مہاراجہ پرتاب سنگھ ان کی میزبانی کے خواہش مند تھے لیکن اُنہوں نے مہاراجہ کا مہمان بننا قبول نہیں کیا۔ وہ اس وادی جنت نظیر کے مختلف شہروں، قصبوں اور دیہاتوں میں گئے۔
کسی بھی جدوجہد یا تحریکِ آزادی میں کسی شاعر کی شمولیت انتہائی اہم کردار ادا کرتی ہے اور اقبال نے اپنی شاعری میں مظلوم کشمیریوں کی آواز کو بلند کیا ہے۔
مقبوضہ وادی جموں کشمیر میں آزادی کی تحریک 1931ء میں شروع ہو چکی تھی۔ اقبال نے اپنے کلام میں کشمیری مسلمانوں کو محکومی اور مظلومی کی زنجیریں توڑنے کا پیغام دیا اور اُن کے دل کے آتش کدے میں آزادی اور حریت کے انگاروں کو اپنے گرم جذبات کی سانسوں سے بھڑکایا۔ اقبال نے اپنی کتاب ’’جاوید نامہ‘‘ میں کشمیری مسلمانوں کو غلامی کی زنجیریں توڑ دینے کا پیغام دیا ہے۔ 1939ء میں علامہ اقبال وفات پا گئے ۔ اس عالمِ فانی سے دنیائے بقا کے سفر پر روانہ ہونے سے قبل بھی وہ مظلوم ، مجبور اور محکوم کشمیریوں کے حوصلوں کو آواز دیتے رہے۔ انہوں نے انہی دنوں یہ دعا کی تھی کہ
’’توڑ اس دست جفا کیش کو یارب …جس نے روحِ آزادی کشمیر کو پامال کیا‘‘
علامہ کو دُکھ تھا کہ انگریزوں نے مہاراجہ گلاب سنگھ ڈوگرا سے 75 لاکھ نانک شاہی سکوں کا تاوان وصول کرکے پوری وادی اس جابر اور سفاک حکمران کے حوالے کردی۔ علامہ اقبال نے1931ء میں مظلوم کشمیریوں کی جدوجہد کو منزل آشنا کرنے کے لئے آل انڈیا کشمیر کمیٹی بھی بنائی۔
جاوید نامہ کے علاوہ علامہ اقبال نے اپنی کتاب’’ ارمغان حجاز میں‘‘ ملا زادہ ضیغم لولابی کشمیری کا بیاض کے عنوان سے کئی نظمیں لکھیں۔ اپنی ایک نظم میں وہ کشمیراور کشمیریوں کی حالتِ زار کا نقشہ ان الفاظ میں کھینچتے ہیں:
آج وہ کشمیر ہے محکوم و مجبور و فقیر
کل جسے اہلِ نظر کہتے تھے ایرانِ صغیر
اقبال کو یقینِ کامل تھا کہ کشمیر میں آزادی کی جو تحریک شروع ہوئی ہے، اِس کو دنیا کی کوئی طاقت دبا نہیں سکتی۔ اسی تناظر میں علامہ فرماتے ہیں:
جس خاک کے خمیر میں ہے آتش چنار
ممکن نہیں کہ سرد ہو وہ خاکِ ارجمند
آج بھارت کی ساڑھے 8 لاکھ افواج کے کشمیریوں کی تحریک حریت کی آگ کو سرد کرنے میں ناکام رہی۔
ہم آج بھی اقبال کی پیروی کرتے ہوئے آزادیِ کشمیر کی جدوجہد جاری رکھے ہوئے ہیں اور یورپ بھر میں مسئلہ کشمیر اور کشمیریوں کے حقوق کو اجاگر کرنے کے لیے آگاہی کی مہم چلا رہے ۔ ہماری جدوجہد اس وقت تک جاری رہے گی، جب تک کشمیریوں پر ظلم و ستم ختم نہیں ہوجاتا اور کشمیریوں کا حق خودارادیت انہیں دیا نہیں جاتا۔
![](https://sahafi.online/wp-content/uploads/2024/07/IMG-20240701-WA0045-1200x630.jpg)